Animación "Coñece a Rosalía"

Hoxe, para conmemorar o Día de Rosalía - 175 aniversario de seu nacemento - e para dar comezo ao concurso de haikus "Haikus para Rosalía", tivemos unha actividade de animación francamente xenial. Tratouse de Coñece a Rosalía, levada a cabo por Crearte. Para levala, contamos coa colaboración e participación dos alumnos e alumnas de 4º de ESO do instituto porriñés Ribeira do Louro.
En Coñece a Rosalía, unha actriz-educadora caracterizada como Rosalía de Castro, saía dos libros para levarnos a un mundo cheo de palabras a través de xogos de creación literaria. Os participantes riron, xogaron, realizaron caligramas e cantaron a Galicia xunto con Rosalía. Todos pasamos unha xornada realmente entretida.

Concurso "Haikus para Rosalía"

A Biblioteca Municipal do Porriño convoca o certame “Haikus para Rosalía”. Tentamos conciliar a visión da natureza na poesía de Rosalía de Castro coa tradición naturalista dos poemas zen xaponeses: os haikus. Achegar Galicia a Xapón, achegar Rosalía ao zen, o concurso tece un fío condutor entre as naturezas dun universo e outro a través da poesía.

Estamos convencidos de que facer haikus é unha disciplina enriquecedora, tan entretida como os xa famosos sudokus e tan efectiva como os brain trainings. Os haikus representan a literatura como arte, pero tamén a literatura como xogo de perspicacia, creatividade, intelixencia e habilidade. E por iso a biblioteca, ademais de abrir o certame para o público en xeral, buscará ao mesmo tempo unha implicación activa dos centros educativos porriñeses a través do seu profesorado.

O concurso comeza simbolicamente o 24 de febreiro, Día de Rosalía de Castro, da que se cumpre este ano o 175 aniversario do seu nacemento, e remata o día 23 de abril, Día do Libro. Animamos a toda a xente a aventurarse no fascinante mundo dos haikus, e participar no novo concurso da Biblioteca do Porriño: o premio será un e-book reader Kindle por categoría.

+ información
Descargar dossier informativo

Boletín de novidades nº 84

Xa tedes na páxina web o novo Boletín de novidades (nº 84)

Gañadora do concurso

Xa temos gañadora do concurso Que mellor cesta de Nadal que unha chea de libros! A gañadora foi Sonia Martínez González, unha nena de 10 anos do Porriño que recibiu o noso premio literario na biblioteca de mans do alcalde, Nelson Santos, e da concelleira de cultura Teresa Veloso. Este ano batemos o record de participación, case o dobre do ano pasado, con 1.450 papeletas.
A biblioteca quere ofrecerlle os seus parabéns á gañadora, e agradecer a participación de todos os seus usuarios e usuarias nesta nova edición do concurso.

Que mellor cesta de nadal que unha... chea de libros!

A Biblioteca Municipal do Porriño convoca o concurso “Que mellor cesta de Nadal que unha chea de libros!”. Dende o luns 12 de decembro, ata o luns 8 de xaneiro, as usuarias e usuarios da biblioteca serán agasallados cunha participación gratuíta para o concurso con cada préstamo a domicilio que efectúen. Será despois do 8 de xaneiro cando de realice o sorteo para coñecer o gañador ou gañadora da cesta de Nadal. A cesta está composta dunha ampla relación de libros de distintas materias (narrativa, pintura, historia, obras de divulgación…) para todas as idades. A concellaría de Cultura dirixida por María Teresa Veloso a través da biblioteca pretende ofrecer como agasallo aos seus usuarios e usuarias unha colección de obras para ler ao longo de todo ano entre toda a familia, empregando este tipo de populares sorteos, máis propios doutros ámbitos e sectores, como un factor dinamizador máis dos nosos servizos.

Feira do Libro e da Artesanía

Dende o xoves 10 de novembro ata o sábado 12 de novembro celebramos a Feira do Libro e da Artesanía, que se desenvolverá na praza Arquitecto Antonio Palacios do Porriño. En horario de 11.00 a 13.30 e de 16.30 a 19.00 horas, ademais de poder visitar as diversas casetas nos que se exporán libros de toda índole e obxectos artesanais, o público tamén poderá gozar con contacontos, talleres e actividades de animación de rúa. A feira contará coa participación das librerías do Porriño e da editorial Barafunda.

Boletín de novidades nº 83

Xa tedes na páxina web o novo Boletín de novidades (nº 83)